«Ազնավուր» քոլեջի ուսանողները ներգրավված են «Ռոստամ և Սոհրաբ» օպերայում
Երևանի Շառլ Ազնավուրի անվան մշակույթի և արվեստի պետական քոլեջի «Դերասանական արվեստ» մասնագիտության 3-րդ կուրսի ուսանողներ Լեո Մանուկյանը և Նորիկ Գևորգյանը, ինչպես նաև 4-րդ կուրսի ուսանող Արեն Մովսիսյանը և «Ռեժիսուրա» մասնագիտության 3-րդ կուրսի ուսանողներ Պարգև Մկրտչյանը և Հրաչիկ Քոչարյանը մասնակից են եղել ներկայացման բեմադրական աշխատանքներին:
Մասնավորապես ուսանողները աշխատել են Իրանից ժամանած ռեժիսոր Յարթա Յարանի և բալետմայստեր Արա Ասատուրյանի հետ:
Առնչվել են բեմական հագուստի ու կոշիկների արտադրական գործընթացին, սերտորեն ծանոթացել դիրիժորի, բալետմայստերի և ռեժիսորի հետ աշխատելու առանձնահատկություններին, բեմական դիմահարդարման և կեղծամների կրման նրբություններին:
Ուսանողները մասնակից են եղել ներկայացման մարտապարերի տեսարաններին, որոնք բեմադրելու համար ծանոթացել և սերտել են բեմական մարտարվեստի կանոնները, բեմական շարժման առանձնահատկությունները։
Առաջնախաղին ներկա են եղել ՀՀ ԿԳՄՍ նախարար Ժաննա Անդրեասյանը, նախարարի տեղակալներ Դանիել Դանիելյանը, Արթուր Մարտիրոսյանը, ՀՀ-ում Իրանի Իսլամական Հանրապետության Արտակարգ և լիազոր դեսպան Ն.Գ. պարոն Մեհդի Սոբհանին:
Սա քոլեջի և Օպերային թատրոնի միջև երկրորդ համագործակցությունն է։ Քոլեջի 12 ուսանող ներգրավված են նաև «Օթելլո» օպերայի բեմադրական աշխատանքներին և հանդես են գալիս դրվագային կերպարներում։